لاہور: نگراں وزیراطلاعات عامر میر نے عمران خان کو شرم سے ڈوب مرنے کا مشورہ دیتے ہوئے کہا ہے کہ لالچی خان نے 9 مئی کے واقعے کے 25 نام نہاد شہداء کے لیے پاکستانی امریکن کمیونٹی سے 5 لاکھ 34 ہزار ڈالر امداد کے طور پر قبول کر لی ہے۔
عامر میر نے عمران خان سے کہا کہ وہ پی ٹی آئی کے 25 نام نہاد شہداء کی فہرست فراہم کریں جن کے نام پر انہوں نے 534,000 ڈالر امداد کے طور پر جمع کیے۔ عامر میر نے کہا کہ یہ غیر ملکی فنڈنگ 9 مئی کی طرح افراتفری اور انتشار پھیلانے کے لیے بھی استعمال کی جائے گی۔ ان کا مزید کہنا تھا کہ 9 مئی کو پنجاب پولیس پر اسلحے کے استعمال پر پابندی لگا دی گئی تھی تاکہ خون خرابہ نہ ہو۔ عامر میر نے کہا کہ پی ٹی آئی والوں کی 25 ہلاکتوں کا دعویٰ حالیہ تاریخ کا سب سے بڑا جھوٹ ہے۔ انہوں نے یہ بھی کہا کہ پنجاب حکومت سوشل میڈیا پر اس پروپیگنڈے کو سختی سے مسترد کرتی ہے کہ حکومت کی جانب سے لاہور کی انسداد دہشت گردی کی عدالت کے جج جسٹس اعجاز بٹر کے خلاف ریفرنس دائر کیا جا رہا ہے۔ ترجمان نے کہا کہ اس حوالے سے سوشل میڈیا پر کیا جانے والا پروپیگنڈہ جھوٹا اور بے بنیاد ہے اور اس میں کوئی صداقت نہیں اور اس جھوٹے پروپیگنڈے کا اصل مقصد حکومت اور عدلیہ کے درمیان غلط فہمیاں پیدا کرنا ہے۔
