لاہور: پوسٹ گریجویٹ میڈیکل انسٹی ٹیوٹ اور لاہور جنرل ہسپتال کو یہ اعزاز حاصل ہے کہ وہ مختلف شعبوں میں مقامی ڈاکٹروں کے ساتھ ساتھ غیر ملکی ڈاکٹروں کو بہترین طبی تعلیم، تربیت فراہم کر رہے ہیں۔ پی جی ایم آئی کو دیگر ممالک نے بھی تسلیم کیا ہے جبکہ 200 پاکستانی اور 10 غیر ملکی ڈاکٹروں نے منی فیلوشپ پروگرام برائے ینگ آرتھوپیڈک کنسلٹنٹس کے تحت آرتھوپیڈک اور اسپائن سرجری کی مختلف خصوصیات میں اپنی تربیت مکمل کی ہے۔
ان خیالات کا اظہار پرنسپل امیر الدین میڈیکل کالج پروفیسر الفرید ظفر نے پروفیسر میاں ایم حنیف کی زیر نگرانی منعقدہ منی فیلو شپ پروگرام کے 10ویں بیچ کی تکمیل پر تقسیم اسناد کی تقریب سے خطاب کرتے ہوئے کیا۔ پرنسپل PGMI نے پروفیسر ایم حنیف اور اس پروگرام کے فوکل پرسن ڈاکٹر شیراز ملک کی کاوشوں کو سراہا۔
اس موقع پر ایچ او ڈی آرتھوپیڈک اینڈ سپائن سرجری پروفیسر ڈاکٹر ایم حنیف نے منی فیلو شپ پروگرام کے اغراض و مقاصد بیان کرتے ہوئے کہا کہ تمام ٹیچنگ ہسپتالوں میں ایسا اکیڈمک پلیٹ فارم قائم کیا جانا چاہیے کیونکہ یہ منی فیلو شپ پروگرام ایک عالمی پروگرام ہے اور اب تک 10 کے قریب بین الاقوامی فیلوز کو تربیت دی جا چکی ہے۔ پروفیسر حنیف نے عراق اور فلوجہ کے ٹیچنگ ہسپتالوں کے ڈاکٹر انس محمد عبداللہ اور زید السراج کی خدمات کو سراہا اور انہیں اپنے مکمل تعاون کا یقین دلایا۔ تقریب میں ڈاکٹر اعجاز احمد، ڈاکٹر خضر غالب، ڈاکٹر نوید علی، ڈاکٹر عبدالعزیز، ڈاکٹر عثمان گل، ڈاکٹر شجاع الدین، ڈاکٹر رضوان شاہ، ڈاکٹر شہزاد، ڈاکٹر ضیاء الدین اور دیگر سینئر ڈاکٹرز نے بھی شرکت کی۔
