پاکستان کے محکمہ موسمیات (پی ایم ڈی) نے ہفتے کے روز پیش گوئی کی ہے کہ کراچی میں آنے والے دنوں میں درجہ حرارت میں اضافے کا امکان ہے۔
محکمہ موسمیات کے مطابق بندرگاہی شہر میں آئندہ تین روز کے دوران گرمی کی شدت میں اضافے کا امکان ہے جب کہ موسم مرطوب رہے گا۔
پارہ 36 ° C سے 38 ° C کے درمیان منڈلانے کی توقع ہے۔ تاہم پی ایم ڈی کے مطابق اس دوران مغرب اور جنوب مغرب سے ہوائیں چل سکتی ہیں۔
محکمہ موسمیات کا یہ بھی کہنا ہے کہ وسطی اور بالائی سندھ میں 8 یا 9 مئی سے گرمی کی شدت میں اضافے کا امکان ہے، اس دوران صوبے کے بیشتر علاقوں میں موسم گرم اور خشک رہے گا۔
تاہم دادو، قمبر شہدادکوٹ، جیکب آباد، جامشورو، اور تھرپارکر میں آج شام یا رات ہلکی بارش کا امکان ہے۔
دریں اثناء آئندہ 12 گھنٹوں کے دوران بالائی خیبرپختونخوا، خطہ پوٹھوہار، شمال مشرقی پنجاب، اسلام آباد، کشمیر اور گلگت بلتستان میں چند مقامات پر گرج چمک کے ساتھ بارش اور ژالہ باری کا امکان ہے۔
تاہم اس دوران شمال مشرقی پنجاب، کشمیر اور ملحقہ پہاڑی علاقوں میں الگ تھلگ شدید بارشوں کی بھی توقع ہے۔
