پشاور: نگراں مشیر برائے صحت خیبرپختونخوا پروفیسر ڈاکٹر عابد جمیل نے جمعرات کے روز انسٹی ٹیوٹ آف کڈنی ڈیزیز، حیات آباد میڈیکل کمپلیکس کا دورہ کیا۔
اس موقع پر نگراں مشیر نے آئی کے ڈی میں مریضوں کو فراہم کی جانے والی سہولیات اور دیگر امور کا جائزہ لیا۔ انہوں نے ڈائیلاسز کے مریضوں اور اٹینڈنٹ کے لیے بنائے گئے ویٹنگ روم کا افتتاح کیا اور ہسپتال کے احاطے میں شجر کاری مہم کے تحت پودا لگایا۔
قبل ازیں ورلڈ کڈنی ڈے کے موقع پر منعقدہ ایک تقریب میں نگراں مشیر صحت کا استقبال ڈائریکٹر IKD-HMC پروفیسر ڈاکٹر مظہر خان نے کیا جنہوں نے مہمان کے ہمراہ ادارے کے مختلف شعبوں کا دورہ کیا۔
IKD کا 28 بستروں پر مشتمل ڈائیلاسز یونٹ مریضوں کو روزانہ کی بنیاد پر سہولیات فراہم کر رہا ہے۔ مریضوں اور حاضرین کی بڑھتی ہوئی تعداد کے پیش نظر انتظار گاہ کی تعمیر کی ضرورت پیش آئی جسے تعمیراتی کام مکمل ہونے کے بعد جمعرات کو کھول دیا گیا۔
